PM मोदींनी मांडलं नव्या भारताचं व्हिजन, भारताच्या प्रगतीचा जगाला फायदा..

NewsZenn Oct 21, 2024 463 0

नवी दिल्ली: पंतप्रधान नरेंद्र मोदी यांनी सोमवारी एनडीटीव्ही वर्ल्ड समिट 2024 या विशेष कार्यक्रमाला संबोधित करताना भारताच्या प्रगतीचा आढावा घेतला. त्यांनी 140 कोटी लोकसंख्येच्या क्षमतेवर जोर देत, या शतकात भारताचं व्हिजन मांडलं. "भारताच्या प्रगतीचा जगाला फायदा होईल आणि भारताचे शतक हे संपूर्ण मानवतेच्या विजयाचे शतक ठरावे," असा विश्वास त्यांनी व्यक्त केला.

तंत्रज्ञानाचा उपयोग सशक्तीकरणासाठी
पंतप्रधानांनी सांगितले की, भारताने नवे डिजिटल उपक्रम आणि लोकशाही मूल्यांना एकत्रित करून दाखवले आहे. "तंत्रज्ञान सर्वसमावेश, पारदर्शकता आणि सशक्तीकरणासाठीचे साधन आहे; हे कोणाला नियंत्रित करण्यासाठी किंवा विभाजनासाठी वापरण्याचे साधन नाही," असे त्यांनी स्पष्ट केले.

स्थैर्य आणि शाश्वततेवर लक्ष
पंतप्रधान मोदींनी भारताच्या स्थैर्य आणि शाश्वततेच्या उपायांवर लक्ष केंद्रीत करण्याची महत्त्वाची बाब सांगितली. गेल्या दशकात भारताने जागतिक आव्हानांचा सामना करण्यासाठी अनेक उपाययोजना केल्या आहेत. "भारताच्या प्रगतीचा जगाला फायदा होईल, भारताचे शतक हे संपूर्ण मानवतेच्या विजयाचे शतक ठरावे," असे मोदींनी यावेळी सांगितले.

कठीण काळात भारताची मदत
"आज जागतिक भविष्याला दिशा देण्यात भारताचा पुढाकार आहे. संकट काळात भारताची मदत होते, याचा जगाला विश्वास वाटतो," असे त्यांनी म्हटले. कोरोना काळात भारताने सुमारे कोट्यवधी जीवनरक्षक लस दुसऱ्या देशांना पुरविल्या, ज्यामुळे संकटात सापडलेल्या देशांना मदत झाली. "कठीण काळात भारत जगाच्या कामी येऊ शकला याचं मला समाधान आहे," असे मोदींनी स्पष्ट केले.

नव्या भारताचं व्हिजन
पंतप्रधान मोदींनी नव्या भारताचं व्हिजन मांडताना सांगितले, "एक युग जे सर्वांच्या कौशल्यावर आधारित असेल, एक युग जे नाविन्याने समृद्ध असेल, एक असे युग जिथे गरिबी नसेल, एक असे युग जिथे सर्वांना समान संधी मिळेल, आणि एक युग ज्यात भारताच्या प्रयत्नांमुळे जगात स्थिरता आणि शांतता नांदेल."

भारताच्या प्रगतीचा आनंद
"जगाने चांद्रयान मोहिमेचे यश साजरे केले. भारताचा विकास झाला की जगाला आनंद वाटतो. भारताच्या प्रगतीमुळे द्वेषाची भावना तयार होत नाही," असे त्यांनी स्पष्ट केले.

मोदींनी भारताच्या ऐतिहासिक भूतकाळाचा उल्लेख करताना सांगितले की, "भारताने गुलामीचा काळ पाहिला, औद्योगिक क्रांतीच्या वेळीही तो गुलाम होता. पण आता भारताचे युग आहे. भारत स्वतंत्र होऊन 75 वर्ष झाली आहेत आणि त्यामुळे भारत सज्ज आहे."

या भाषणात पंतप्रधान मोदींनी स्पष्ट केले की, भारत आता एक बलवान राष्ट्र बनला आहे, ज्याने संधींचा लाभ घेण्यासाठी स्वतःला सक्षम केले आहे.