जागतिक मासिकपाळी दिन विशेष, क्योंकि दाग अच्छे हैं!" - लेखिका स्मिता सुनील

NewsZenn May 28, 2025 276 0

पहिल्यांदा जेव्हा मासिक पाळी चालू झाली,ते माझ्या आधी आईलाच कळलं.तिनं ओढून कुशीत घेतलं अन् हुंदके आवरत आवरत रडायला लागली.मी गप-गार होऊन विचार करु लागले,मी काय केलं.? आईला अचानक हुंदका का दाटून आला.? पण 'टोटल लागेना.. थोड्यावेळानं बिचा-या आईनंच स्वत:ला सावरलं कारण मला या पुढं मला पडणा-या प्रश्नांना अन् मलासुद्धा तिलाच आवरायचं होतं..!

इथून चालु झाली, "स्त्री जन्मा तुझी कहाणी"..!
आई सांगत होती,मी ऐकत होते....
आई घड्या देत होती,मी वेदना गुंडाळत होते....
आई उत्तरं देत होती,मला प्रश्न पडत होते.....
आई वागणं सांगत होती,मी जगणं शोधत होते....
आई नियम देत होती,मी जड श्वास घेत होते....
आई जगण्याची कास देत होती,मी मोकळा श्वास मागत होते....
आई बाईपण,आईपण देत होती,मी माणुसकी शोधत होते..
खूप वर्षे हे नियम,हि घालमेल,हे प्रश्न असाच 'थैथयाट' चालू होता..वाढत्या वयानुसार प्रश्नांची उत्तरं मिळत गेली पण माणुसकी नाही..समानता नाही.. मुलगा-मुलगी यातलं अंतर कधीच कापता आलं नाही..
कदाचित, मी पण भ्याड होते.. पाळीच्या संदर्भात मी बोलले नाही त्यावेळी माझ्या वडिलांना,भावांना आणि मित्रांनासुद्धा..मी लपवल्या माझ्या त्या दिवसातल्या वेदना.. तो त्रास मी एकटीनं सोसला,आई नं निमूट पाहिला.. आईला साधं विचारलं ही नाही की, यात लपवण्यासारखं आहे तरी काय.??
जर पाळी माझ्या "बाईपणाचा-आईपणाचा सम्मान" आहे तर यात लाज कसली.??
त्या काळाच्या मानानं आजचा काळ हलकासा सुखावह वाटतो आहे..शाळेपासून ते घरापर्यंत, मैत्रिणीपासून ते मित्रांपर्यंत, वडिलांपासून ते नव-यापर्यंत 'पाळी' 'पँड' हे विषय निदान चर्चेत आहेत..!
कुणाचं काय मत,कुणाची कशी वागणूक हे तर प्रत्येक उंब-यानिशी बदलत जाणारं सत्य आहे..
'गुड टच-बँड टच' याविषयी बोलताना या "डागांवरही" निखळ चर्चा होतेय आणि व्हावीच..
एरव्ही प्रत्येक स्त्री असतेच न ठाम, सक्षम, सोशीक,कष्टाळू,मायाळू अगदीच ज्याला ज्या रुपात हवी तशीच.. मग तिच्या 'पाळीच्या' दिवसांत प्रत्येक पुरुषानं (वडील,भाऊ,मित्र,प्रियकर,नवरा) तिच्यासाठी फार काही नाही तिला फक्त कुशीत जरी घेतलं तरी तिचं ते दुखणं नक्कीच "सुखकर" होईल...!
प्रत्येक लेकीचं सुख आतापासूनच लेकांमध्ये पेरायला सुरवात केली तर येणारा काळ उरात काळजी घेऊन उगवेल..
पाळीच्या डागांना 'कलंक' समजण्याचे दिवस आता मागे पडायला हवेत,हे डाग म्हणजे ऊर्जेचा आणि जन्माचा स्त्रोत आहे.
इतकंच..