BCCI अध्यक्ष सौरव गांगुलीला ह्रदयविकाराचा झटका

NewsZenn Jan 2, 2021 822 0

भारतीय संघाचा माजी कर्णधार आणि BCCI अध्यक्ष सौरव गांगुली याला हृदयविकाराचा झटका आल्याने रूग्णालयात दाखल करण्यात आले आहे. जिममध्ये व्यायाम करत असतानाच त्याच्या डोळ्यापुढे अंधारी आली अशी माहिती हॉस्पिटलमधील सूत्रांकडून देण्यात आली आहे. त्यानंतर गांगुलीला दक्षिण कोलकाता येथील वूडलँड या एका खाजगी रूग्णालयात दाखल करण्यात आले आहे. शुक्रवारी सकाळी घरी जिममध्ये काही काळ घालवल्यानंतर गांगुलीला अस्वस्थ वाटू लागले. त्यानंतर त्याला तातडीने रुग्णालयात दाखल करण्यात आले. गांगुलीला 'कार्डियक अरेस्ट' सौम्य झटका बसला असून काही चाचण्या केल्यानंतर त्याच्यावर अँजिओप्लास्टी केली जाणार असल्याचे समजते. मिळालेल्या माहितीनुसार, त्याच्यावर आज सांयकाळी अँजिओप्लास्टीची शस्त्रक्रिया होणार आहे. हे वृत्त कळताच अनेक मान्यवरांनी त्याच्या तब्येतीची विचारपूस करत प्रार्थना केली जात आहे.
जय शहा यांचे ट्वीट
बीसीसीआयचे सचिव जय शहा यांनी गांगुलीची प्रकृती स्थीर असल्याचे सांगितले. त्यांच्या प्रकृतीत लवकर सुधारणा व्हावी. मी त्याच्या कुटुंबीयांशी बोललो असून दादाची प्रकृती स्थिर आहे. तो उपचारांना चांगला प्रतिसाद देत आहे, असे त्यांनी सोशल मीडियावर म्हटले आहे.

पश्चिम बंगालच्या मुख्यमंत्री ममता बॅनर्जी यांनी गांगुलीच्या प्रकृतीसंदर्भात काळजी व्यक्त केली आहे. त्याच्या प्रकृतीत लवकर सुधारणा व्हावी, असे ममता बॅनर्जी यांनी म्हटले आहे.