Pune Breaking News : महापालिका आणि महापौर कार्यालयाला बॉम्बने उडवण्याची धमकी!

NewsZenn Jun 10, 2026 5 0

पुणे : पुणे महापालिकेच्या मुख्य कार्यालय व माननीय महापौर कार्यालय या ठिकाणी बॉम्ब ब्लास्टबाबतचा ईमेल थेट प्राप्त झालेला आहे. महापालिका आयुक्त नवल किशोर राम यांच्या सूचनेनुसार संपुर्ण मुख्य इमारत खाली करण्यात आली असून बॉम्बशोधक पथकाकडून शोधकार्य चालू आहे. शोधकार्य पूर्ण झाल्यानंतरच मुख्य इमारत कामकाज चालू होईल. तोपर्यंत पुणे महानगरपालिका आवारात प्रवेश निषिद्ध करण्यात आल्याची माहिती समोर आली आहे.

अधिकृत ईमेल पत्त्यावर धमकीचा संदेश
पुणे महापालिका भवनामध्ये बॉम्ब ठेवल्याचा मेल आल्यानंतर संपूर्ण महापालिका मोकळी केली कर्मचारी अधिकारी गेटच्या बाहेर उभे आहेत. पोलिसांकडून तपासणी सुरू असून तपासणी पूर्ण झाल्यानंतरच कामकाज सुरू होणार आहे. तोपर्यंत सर्वांना इमारतीच्या बाहेर काढण्यात आलं असून, सर्व प्रवेशद्वार बंद करण्यात आली आहेत. महानगरपालिकेच्या अधिकृत ईमेल पत्त्यावर हा धमकीचा संदेश प्राप्त झाला. या घटनेची माहिती मिळताच स्थानिक पोलीस अधिकारी, बॉम्ब शोधक व नाशक पथक तसेच श्वान पथक घटनास्थळी दाखल झाले. सुरक्षेचा उपाय म्हणून पोलिसांनी तात्काळ संपूर्ण इमारतीचा ताबा घेतला असून बाहेरील व्यक्तींना आत जाण्यास प्रतिबंध करण्यात आला आहे. सध्या पथकाद्वारे प्रत्येक विभागाची आणि संवेदनशील ठिकाणांची कसून तपासणी करण्यात येत आहे.

खोडसाळपणा की अन्य काही कारण?
प्राथमिक माहितीनुसार, हा संदेश कुठून आणि कोणी पाठवला? याचा शोध घेण्यासाठी सायबर गुन्हे शाखेची मदत घेतली जात आहे. हा प्रकार केवळ एक खोडसाळपणा आहे की यामागे अन्य काही कारण आहे? याचा तपास पोलीस करत आहेत. सध्या महानगरपालिका परिसरामध्ये शांतता असून नागरिकांनी कोणत्याही अफवांवर विश्वास ठेवू नये, असं आवाहन प्रशासनाच्या वतीने करण्यात आलं आहे. पोलिसांचा तपास पूर्ण झाल्यानंतरच या संदर्भातील अधिकृत माहिती समोर येईल.

दरम्यान, पुणे शहरात दररोज काही ना काही घटना घडत असतातच. हत्या, अत्याचार, गुंडगिरी, दरोडा आणि कोयता गँग यांसारख्या गोष्टी आता नेहमीच्याच झाल्या आहेत. पुणे शहरातील स्थानिक जनता आता पोलीस प्रशासनाला सवाल करत आहेत की, 'पुण्यातील या वाढत्या गुन्हेगारीला पोलिसांचा धाक आहे की नाही?'