Pune ST Bus : पुण्यातील प्रवाशांसाठी आनंदाची बातमी; शहरांसह छोटी-मोठी गावे जोडणारी शटल सेवा सुरू, प्रवास अधिक वेगवान!

NewsZenn Jun 11, 2026 9 0

पुणे : पुणे जिल्हा आणि आसपासच्या ग्रामीण भागांतील प्रवाशांसाठी पुणे विभागात पहिल्या टप्प्यात १०० जिजाऊ बस दाखल होणार आहेत. त्यापैकी २५ बस दाखल झाल्या असून, त्या ग्रामीण भागात शटल सेवा म्हणून चालवल्या जात आहेत. येत्या काळात मिळणाऱ्या बस विविध आगारांना देऊन ग्रामीण भागातील शटल सेवा सक्षम केली जाणार आहे.

पुण्यातून राज्याच्या कानाकोपऱ्यात बससेवा दिली जाते. पण, पुणे जिल्ह्यातील शहरे, छोटी-मोठी गावे जोडणारी शटल सेवा खूपच कमी आहे. त्या मार्गावर आता नव्याने येणाऱ्या जिजाऊ बस दिल्या जाणार आहेत. पुणे एसटी विभागाने सार्वजनिक वाहतूक अधिक वेगवान, सुरक्षित आणि आधुनिक करण्यासाठी एसटी महामंडळाकडे २५० नवीन ‘राजमाता जिजाऊ’ शटल बसची मागणी केली आहे. यातील पहिल्या टप्प्यात १०० बस येणार आहेत. त्यामधील २५ बस पुणे विभागात दाखल होऊन, त्यांनी सेवा देणे सुरू केले आहे.

शिवाजीनगर आगाराला पाच बस (शिवाजीनगर-भीमाशंकर मार्ग) आणि स्वारगेट आगाराला एक बस देण्यात आली आहे. या एसटी बसला प्रवाशांचा चांगला प्रतिसाद मिळत आहे. एसटी महामंडळाच्या ‘शिवनेरी’ किंवा ‘शिवाई’ यांसारख्या प्रीमियम सेवांच्या तुलनेत ही शटल सेवा सर्वसामान्यांना परवडणारी आहे. महिला प्रवाशांच्या सुरक्षेला यात प्राधान्य देण्यात आले आहे.

एसटी महामंडळाकडे आम्ही २५० बसची मागणी नोंदवली असून, पुढील महिनाभरात १०० बस दाखल होण्याची शक्यता आहे. यामुळे विशेषतः ग्रामीण भागातील प्रवाशांची मोठी सोय होणार असून, या नवीन बस कोणत्या मार्गावर चालवायच्या याचे सूक्ष्म नियोजन आम्ही केले आहे.
- कमलेश धनराळे, विभागीय वाहतूक अधिकारी, पुणे एसटी विभाग

राजमाता जिजाऊ बसची वैशिष्ट्ये
प्रवासी क्षमता: ५६ आसन क्षमता.
सुरक्षा यंत्रणा : पाच सीसीटीव्ही कॅमेरे आणि पॅनिक बटण.
अत्याधुनिक तंत्रज्ञान : जीपीएस ट्रॅकिंग आणि इलेक्ट्रॉनिक फलक.
विशेष सुविधा : थांबा (स्टॉप) येण्यापूर्वीची अनाउन्समेंट सिस्टीम.