क्रिकेटप्रेमींनी अनुभवला 'एसपीएल'चा थरार!

NewsZenn Sep 20, 2022 881 0

भोसरी : शिवराय प्रीमियर लिगने घेतलेल्या क्रिकेट स्पर्धेत सहा संघ मैदानात विजयाची ट्रॉफी मिळविण्यासाठी एकमेकाशी भिडले अन् उत्कृष्ट खेळ दाखवत प्रेक्षकांची मने जिंकली. भरपावसात खेळाडूनी धावांचा पाऊस पाडला आणि क्रिकेटप्रेमीना एसपीएलचा थरार अनुभवायला मिळाला.

लोहगाव येथील जगद्गुरू स्पोर्ट क्लबच्या मैदानावर ही स्पर्धा मोठ्या उत्साहात पार पडली. या स्पर्धेत मंगलम मास्टर्स, जगद्गुरु वारियर्स, आस्था स्टायकर्स, रॉकफिट टायगर्स, फिटनेस वारियर्स आणि शिवराय स्टार्स या टीम सहभागी झाल्या होत्या. अंतिम सामन्यात आस्था स्ट्रायकर विरुद्ध फिटनेस वारियर्स या दोन टीम आमने-सामने होत्या. एरेना फिटनेस वारियर्सचे सर्व खेळाडू नावाप्रमाणेच फिट होते. त्यांच्या तगड्या | शरीरयष्टीकडे पाहून आस्था स्टायकर्स टीम त्याच्यासमोर तग धरू शकेल का, याबाबत प्रेक्षकांच्याही मनात शंका होती. पण क्रिकेट हा खेळ अनिश्चिततेचा आहे, असे समजले जाते. पुढच्या बॉलला काय चमत्कार घडेल, हे कुणीही सांगू शकत नाही.

आस्था टीम सुरुवातीपासून सांघिक एकतेचे प्रदर्शन घडवत सर्व राउंड जिंकून फायनलमध्ये पोहोचली होती. परंतु एसपीएलची ट्रॉफी जिंकण्यासाठी त्यांना फिटनेस वारियर्सशी टक्कर द्यावी लागणार होती. अंतिम सामन्यात आस्थाने फिटनेसच्या वारियर्सना चांगलेच झुंजविले. फिटनेस वारियर्ससमोर जिंकण्यासाठी एक बॉल आणि तीन धावा असे लक्ष्य होतं. करो या मरो अशी स्थिती होती. या सामन्यात शेवटच्या बॉलवर षटकार ठोकत फिटनेस वारियर्स टीम एसपीएलच्या ट्रॉफीवर आपलं नाव कोरण्यात यशस्वी ठरली. अत्यंत चित्तथरारक आणि लक्षवेधी खेळ दाखवित सर्वच संघांनी सर्वोत्तम कामगिरी केली.

बक्षीस वितरणाचा कार्यक्रम आमदार सुनील अण्णा टिंगरे, नगरसेवक शितल शिंदे, कॉर्नर मोबाईल अँड इलेक्ट्रॉनिक्सचे संतोष वाघमोडे, युवानेते गणेश खांदवे यांच्या शुभ हस्ते पार पडला. प्रशांत जाधव यांनी सूत्रसंचालन केले शिवराय प्रोडक्शनचे डायरेक्टर विश्वास काशीद यानी आभार मानले.

विजेते संघ असे
फिटनेस वारियर्स प्रथम, आस्था स्टायकसे द्वितीय, जगद्गुरू वारियर्स तृतीय तर मंगलम मास्टर्सने चतुर्थ क्रमांक पटकावला.

लक्षवेधी समालोचन
या संपूर्ण स्पर्धेत आकर्षणाचा केंद्रबिंदू ठरले ते लक्षवेधी समालोचन, प्रवीण कामटकर यांच्या अत्यंत अभ्यासपूर्ण आणि ओघवत्या भाषाशैलीतल्या समालोचनाने प्रेक्षकांची मने जिंकली.

Click Here To See More