अगोदर फी भरा मग हॉलतिकीट घ्या

NewsZenn Mar 14, 2022 848 0

दहावीची परीक्षा मंगळवार पासून सुरु होत आहे. कोरोना साथीतून सावरल्यानंतर दोन वर्षानंतर विद्यार्थी परीक्षांसाठी प्रत्यक्ष शाळांमध्ये जात आहेत. मात्र फी न भरल्यामुळे काही शाळांकडून विद्यार्थ्यांची अडवणूक केली जात आहे. अगोदर फी भरा मग हॉलतिकीट घ्या, असा पवित्रा घेऊन शाळांनी अडवणूक सुरु केली आहे. यामुळे विद्यार्थी आणि पालकांमध्ये चिंतेचे वातावरण निर्माण झाले आहे.

सन २०२० पासून कोरोनाची साथ आली. त्यामुळे शाळा बंद झाल्या. काही कालावधीनंतर ऑनलाईन शिक्षणाला सुरुवात झाली. दिवसभरात अवघ्या काही तासांची शाळा ऑनलाईन माध्यमातून भरू लागली. त्यातूनच अभ्यासक्रम उरकण्यावर अनेक शाळांनी भर दिला. यामध्ये विद्यार्थ्यांच्या गुणवत्तेबाबत प्रश्नचिन्ह निर्माण होऊ लागले.

या कोरोना संकटानंतर यावर्षी विद्यार्थी प्रत्यक्ष शाळांमध्ये जाऊन परीक्षा देणार आहेत. शिक्षण विभागाने त्याची तयारी केली असून मंगळवारपासून इयत्ता दहावीची परीक्षा सुरु होत आहे. अशा परिस्थितीत भोसरी मधील एका शाळेने विद्यार्थ्यांची अडवणूक सुरु केली आहे. कोरोना काळात रोजगार गेल्याने फी भरू न शकलेल्या पालकांना अगोदर फी भरा मग विद्यार्थ्यांचे हॉलतिकीट घ्या असा पवित्रा शाळांनी घेतला आहे.

पालकांची अडचण समजून घेत शाळांनी बार्गेनिंग देखील केले आहे. हॉलतिकीट घेण्यापूर्वी अर्धी फी भरा आणि निकाल घेण्यापूर्वी अर्धी फी भरा अशी ऑफर शाळांकडून पालकांना मिळत आहे. मात्र आर्थिक विवंचनेत असलेल्या पालकांना सध्या अर्थी फी भरणे देखील शक्य नसल्याचे पालकांचे मत आहे.

पालक धनंजय पवार ‘एमपीसी न्यूज’शी बोलताना म्हणाले, “मी माझ्या पाल्याची फी कोरोना साथ येण्यापूर्वी पूर्ण भरली होती. मात्र कोरोना काळात माझा रोजगार गेला. त्यामुळे या काळातील फी भरणे मला जमत नाही. अशा वेळी शाळा हॉलतिकीट देण्यासाठी अडवणूक करत आहे. शाळांनी अशी भूमिका घेतल्यास विद्यार्थ्यांचे शैक्षणिक मोठे नुकसान होणार आहे.”

Click Here To See More