टाटा मोटर्समध्ये टीपीजी आणि अन्य गुंतवणूकदारांची ७,५०० कोटींची गुतंवणूक

NewsZenn Oct 13, 2021 665 0

विद्युत शक्तीवर चालणाऱ्या प्रवासी वाहनांच्या टाटा मोटर्सच्या प्रयत्नांना गुंतवणूकदारांकडून अपेक्षित प्रतिसाद मिळत असून, टीपीजी राइज क्लायमेट आणि अन्य सह-गुंतवणूकदारांनी १ अब्ज अमेरिकी डॉलर (सुमारे ७,५०० कोटी रुपये) उभारले जाणार असल्याचे कंपनीकडून मंगळवारी जाहीर करण्यात आले.

या निधीचा विनियोग नव्या उपकंपनीमार्फत विद्युत शक्तीवर चालणाऱ्या मोटारींच्या व्यवसायाला चालना देण्यासाठी आणि १० ई-मोटारींचे मॉडेल बाजारात आणण्याची योजना साकारण्यासाठी केला जाणार आहे. एकंदर २ अब्ज अमेरिकी डॉलर म्हणजे साधारण १६,००० कोटी रुपये खर्चाची ही योजना आखण्यात आली असल्याचे टाटा मोटर्सने स्पष्ट केले.

टीपीजीसह, एडीक्यू या गुंतवणूकदार संस्थांकडून ही प्रस्तावित उपकंपनीत गुंतवणूक येऊ घातली असून, त्यांना या कंपनीत ११ ते १५ टक्क्य़ांच्या घरात भागभांडवली मालकी दिली जाणे अपेक्षित आहे. या प्रस्तावित कंपनीचे मूल्यांकन ९.१ अब्ज अमेरिकी डॉलर इतके अंदाजण्यात आले आहे. टाटा मोटर्सने भारत सरकारने निर्धारीत केलेल्या लक्ष्याप्रमाणे २०३० सालापर्यंत रस्त्यावर धावणाऱ्या ३० टक्के मोटारी या विद्युत शक्तीवर चालणाऱ्या असतील या उद्दिष्टाशी बांधिलकी दर्शवत वाटचाल सुरू केली आहे, असे कंपनीचे अध्यक्ष एन. चंद्रशेखरन यांनी सांगितले. कंपनीच्या या प्रवासात टीपीजी क्लायमेट राइज व अन्य प्रतिष्ठित गुंतवणूकदारांची सोबत मिळणे भाग्याचेच आहे, अशी पुस्तीही त्यांनी जोडली.

Click Here To See More