भाजप हाच मनोज जरांगे आणि आमचा शत्रु, संभाजीराजेंनी घेतली मनोज जरांगे यांची भेट..

NewsZenn Oct 26, 2024 283 0

जालना : भाजप हाच मनोज जरांगे आणि आमचा एकमेव शत्रू आहे. त्यामुळे ह्या निवडणूकीत मनोज जरांगे आणि आम्ही एकत्र येणे गरजेचे आहे, असे प्रतिपादन महाराष्ट्र स्वराज्य पक्षाचे प्रमुख संभाजीराजे छत्रपती यांनी आंतरवली सराटी येथे केले.

संभाजीराजे छत्रपती यांनी आज आंतरवली सराटी मध्ये मनोज जरांगे यांची भेट घेत विधानसभा निवडणुकीच्या रणनीती बाबत त्यांच्याशी चर्चा केली. त्यानंतर झालेल्या पत्रकार परिषदेत ते बोलत होते. यावेळी महाराष्ट्र स्वराज्य पक्षाचे सरचिटणीस धनंजय जाधव हे देखील उपस्थित होते.

पत्रकार परिषदेत बोलताना संभाजीराजे छत्रपती म्हणाले की, मराठा समाजाला एका छताखाली आणण्याचा माझा प्रयत्न आहे. मनोज जरांगे ही त्यासाठी लढा देत आहेत. सुरवातीपासूनच मी मनोज जरांगे यांच्या सॊबत आहे. भाजप हा आमचा एकमेव शत्रु आहे, त्यामुळं आम्ही एकत्र येणे गरजेचे आहे. मनोज जरांगे आणि माझे उद्दिष्ट एकच आहे. उद्दिष्ट एक असताना जर वेगवेगळे लढलो तर समाजात एक वेगळा संदेश जाऊ शकतो. तो जाऊ नये यासाठी आपण एकसंध राहणे गरजेचे असल्याबाबत जरांगे यांच्याशी चर्चा झाल्याचे त्यांनी सांगितले.

महाराष्ट्र स्वराज्य पक्ष हा अधिकृत पक्ष झाला आहे. २९ तारखेच्या आधी एबी फॉर्म द्यावे लागतात, म्हणून आपण एकसंध कसे राहू शकतो असा निर्णय होणे गरजेचे असल्याचे संभाजीराजे छत्रपती यांनी जरांगे यांच्याशी केलेल्या चर्चेत सांगितले. जरांगे पाटील चांगला निर्णय घेतील, याची मला खात्री आहे. आम्हाला उद्या समाजाला उत्तर द्यायचं आहे. मतविभागणी होऊ नये म्हणून माझे प्रयत्न आहेत.

अपक्ष उमेदवार देताना धोका लक्षात घ्यावा

संभाजीराजे छत्रपती म्हणाले की, अपक्ष उमेदवार देताना ते निवडून आल्यास धोका जास्त संभवतो. तो लक्षात घ्यायला हवा. अपक्ष उमेदवार हे समाजाला फसवू शकत नाही हे इथं मान्य केलं. पण, याची खात्री आहे का? त्यामुळे सगळी समीकरण लक्षात घेऊन आपण एकत्र जाऊ शकतो यावर चर्चा झाली.

जरांगेंनी स्वराज्यच्या चिन्हावर उमेदवार द्यावेत

स्वराज्य हा मनोज जरांगे यांचा हक्काचा पक्ष आहे. त्यामुळं त्यांनी अपक्ष उमेदवार देण्याऐवजी ते स्वराज्यच्या चिन्हावर लढवावेत. त्यांना ताकद देणे ही माझी नेहमी भूमिका राहिली आहे. जरांगे पाटील सोबत आले तर ते देतील ते उमेदवार मान्य असतील. असेही संभाजीराजे छत्रपती म्हणालेत.