पुणे हडपसर बॉम्ब प्रकरण : उपचारासाठी पैसे नसल्याने 400 रुपयांत बनवला बॉम्ब; आरोपी नागपुरातून ताब्यात

NewsZenn May 16, 2026 38 0

पुणे : हडपसर परिसरात घडलेल्या बॉम्बसदृश वस्तू प्रकरणात पोलिसांनी मोठी कारवाई करत आरोपी राठोड याला नागपूर रेल्वे स्थानकावरून ताब्यात घेतले आहे. प्राथमिक तपासात हा प्रकार दहशतवादी कारवाईचा नसून वैयक्तिक आर्थिक अडचणीमुळे घडल्याचे समोर आले आहे.

पोलिसांनी दिलेल्या माहितीनुसार, आरोपीने केवळ सुमारे 400 रुपयांत डिजिटल घड्याळ, चार पाईप, वायर आणि सेलो टेपचा वापर करून बॉम्बसदृश वस्तू तयार केली होती. मात्र त्यामध्ये कोणतेही स्फोटक पदार्थ आढळलेले नाहीत, अशी प्राथमिक माहिती फॉरेन्सिक तपासातून समोर आली आहे.

आरोपीला उपचारासाठी पैशांची गरज होती. 10 मे रोजी तो रुग्णालयात उपचारासाठी गेला होता, मात्र आर्थिक अडचणीमुळे त्याने हा प्रकार केल्याचा संशय पोलिसांनी व्यक्त केला आहे. तसेच रुग्णालयाला खंडणीची धमकी देण्याच्या उद्देशाने हा बनाव रचल्याचा प्राथमिक अंदाज आहे, मात्र प्रत्यक्षात कोणतीही धमकी देण्यात आलेली नव्हती.

पोलिस तपासानुसार आरोपी युट्युबवरील व्हिडिओ पाहून बॉम्बसदृश वस्तू तयार करत होता. तो मूळचा सोलापूरचा असून मांजरी परिसरात कपडे व शूजचे दुकान चालवतो. त्याच्या घरातून सुमारे 2 किलो गांजा जप्त करण्यात आला असून याबाबतही तपास सुरू आहे.

घटनेनंतर आरोपी नागपूरहून हावडा मार्गे नेपाळला पळून जाण्याच्या तयारीत होता. त्याची बहीण नेपाळमध्ये राहत असल्याची माहितीही समोर आली आहे. सीसीटीव्ही आणि रेल्वे तपासाच्या आधारे पोलिसांनी त्याचा माग काढत नागपूर रेल्वे स्थानकावर त्याला पकडले.

पुण्याचे पोलीस आयुक्त अमितेश कुमार यांनी दिलेल्या माहितीनुसार, या प्रकरणात कोणताही दहशतवादी अँगल आढळलेला नाही. आरोपी एकटाच होता आणि त्याची कोणतीही गुन्हेगारी पार्श्वभूमी नाही. सध्या त्याची चौकशी सुरू असून पुढील तपास फॉरेन्सिक अहवालानंतर अधिक स्पष्ट होणार आहे.