राज्यात ओमायक्रॉनच्या ८ रुग्णाची भर

NewsZenn Dec 15, 2021 772 0

राज्यात मंगळवारी ओमायक्रॉनचे आणखी आठ रुग्ण आढळले असून त्यापैकी सात मुंबईतील तर एक वसई-विरार येथील आहे. ओमायक्रॉनबाधित एकूण रुग्णांची संख्या आता २८ झाली आहे.

नव्याने आढळलेले आठ रुग्ण हे २४ ते ४१ या वयोगटातील असून यात पाच पुरुष आणि तीन महिलांचा समावेश आहे. बाधित पाच रुग्णांना सौम्य, तर तीन रुग्णांना कोणतीही लक्षणे नाहीत.

आठ रुग्णांपैकी सात जणांचे लसीकरण झाले आहे. राष्ट्रीय विषाणू विज्ञान संस्थेच्या (एनआयव्ही) जनुकीय अहवालामध्ये त्यांना ओमायक्रॉनची बाधा झाल्याचे आढळले. या रुग्णांचे () नमुने गेल्या आठवड्यात पाठविले होते.

बाधितांपैकी एक रुग्ण ब्रिटनहून डिसेंबरच्या पहिल्या आठवड्यात परतला होता. हा रुग्ण कोरोनाबाधित आढळल्यामुळे याच्या संपर्कात असलेल्या त्याच्या कार्यालयातील अन्य सात जणांच्याही चाचण्या करण्यात आल्या. त्यांना ओमायक्रॉनची बाधा झाल्याचे मंगळवारी स्पष्ट झाले आहे. या रुग्णांच्या सहवासातील इतर व्यक्तींचा शोध घेण्यात येत आहे.

राज्यात यापूर्वी बाधित आढळलेल्या २० रुग्णांपैकी नऊ जण ‘आरटीपीसीआर’ चाचणीत बाधित नसल्याचे आढळल्यामुळे त्यांना घरी पाठविण्यात आले.

राज्यात ६८४ रुग्णांचे नव्याने निदान
राज्यात मंगळवारी ६८४ करोनाबाधित रुग्ण नव्याने आढळले, तर २४ रुग्णांचा मृत्यू झाला. तसेच मंगळवारी ६८६ रुग्ण बरे होऊन घरी परतले. सध्या राज्यात ६ हजार ४८१ रुग्ण उपचाराधीन आहेत. राज्यभरात ७५ हजार ४९२ व्यक्तींचे घरातच विलगीकरण केले आहे, तर ८८० जण संस्थात्मक विलगीकरणात आहेत.

सर्वाधिक मुंबईत…
सध्या ओमायक्रॉनबाधित १२ रुग्ण मुंबईत आहेत. तसेच पिंपरी चिंचवडमध्ये १०, पुणे मनपामध्ये दोन आणि कल्याण-डोंबिवली, नागपूर, लातूर, वसई-विरारमध्ये प्रत्येकी एक रुग्ण आढळला आहे.

Click Here To See More