दिवाळीचा पहिला दिवा राष्ट्रमाता जिजाऊंच्या चरणी

NewsZenn Nov 14, 2020 1006 0

शिवप्रेमींच्यावतीने दीपोत्सवाचे आयोजन

कोरोनाच्या जागतिक महामारीच्या पार्श्वभूमीवर गेल्या पाच वर्षांची परंपरा खंडित होऊ नये यासाठी लाल महालात दीपावली निमित्ताने प्रातिनिधिक स्वरूपात दीपोत्सवाचे आयोजन करण्यात आले होते. आज समाजात प्रत्येक जण अस्वस्थ आहे. कुणाच्या घरातील व्यक्ती तर कुणाचे नातेवाईक, कोरोनामुळे हे जग सोडून गेले आहेत. या महामारीचा धोका कमी झालेला असला तरीही संपूर्णपणे नायनाट झालेला नाही. त्यामुळे दिवाळीच्या आनंदावर दुःखाचे सावट स्पष्टपणे जाणवत आहे. त्यामुळे या वर्षीचा दीपोत्सव हा अत्यंत छोट्या स्वरूपात साजरा करण्यात आल्याचे विकास पासलकर यांनी आपल्या प्रास्ताविकात सांगितले. राजर्षी शाहू महाराज सोशल फाउंडेशनच्या माध्यमातून दर वर्षी वसूबारसच्या दिवशी संध्याकाळी सात वाजता दीपोत्सवाचे आयोजन करण्यात येते.
कर्तृत्ववान व्यक्तींचा सन्मान लाल महालात केला जातो ही राष्ट्रमाता जिजाऊ आणि छत्रपती शिवरायांची परंपरा जपत पुण्याचे अतिरिक्त आयुक्त म्हणून नुकतीच पदोन्नती मिळालेले मा.सुरेश जगताप यांचा सन्मान संभाजी ब्रिगेड, अखिल भारतीय शिवमहोत्सव समिती आणि राजर्षी शाहू महाराज सोशल फाउंडेशनच्या वतीने करण्यात आला. सुरेश जगताप यांनी पुणे महापालिकेत विविध विभागांमध्ये प्रमुख पदावर उत्कृष्ट काम केले आहे. अनेक दिवसांपासून पुण्याच्या अतिरिक्त आयुक्तपदाची उत्कंठा पुणेकरांना लागलेली होती, त्याला साजेशी व्यक्ती आपल्याला सुरेश जगताप साहेबांच्या रूपाने लाभली असल्याचे मा.विकास पासलकर यांनी आपल्या मनोगतात म्हटले. आयएएस ऐवजी पुण्याच्या महापालिकेतील व्यक्ती अतिरिक्त आयुक्त म्हणून लाभण्याची पुण्याच्या इतिहासातील ही पहिलीच वेळ आहे, त्या अर्थाने या पदोन्नतीला ऐतिहासिक महत्त्व असल्याचेही मत विकास पासलकर यांनी व्यक्त केले. अशा ऐतिहासिक पार्श्वभूमीवर मा.जगताप साहेबांचा सन्मान ऐतिहासिक पार्श्वभूमी असलेल्या लाल महालात करण्यात येत आहे याचे फलित म्हणून पुण्याचा चेहरा मोहरा बद्दलवणारे ऐतिहासिक निर्णय जगताप साहेब घेतील व पुण्याला जिजाऊंचे पुणे ही ओळख पुन्हा प्राप्त करून देतील अशी आशा पासलकर यांनी व्यक्त केली. दारुगोळा कारखाना खडकी येथून सेवानिवृत्त झालेली संभाजी घावटे यांचा देखील या प्रसंगी सन्मान करण्यात आला. कोरोनाच्या पार्श्वभूमीवर आयोजित करण्यात आलेल्या लाल महाल दीपोत्सव व सन्मान प्रसंगी आयोजित छोटेखानी कार्यक्रमात ते बोलत होते. या प्रसंगी आत्महत्याग्रस्त शेतकरी कुटुंबातील श्रीमती कविता मिंढे यांना साडी चोळीची भेट लाल महालात देण्यात आली व त्यांचा मुलगा अनिकेत मिंढे याला राजर्षी शाहू महाराज सोशल फाउंडेशनच्या शिष्यवृत्ती योजनेचा धनादेश मान्यवरांच्या हस्ते देण्यात आला. फक्त दिवे लावून आपली जबाबदारी संपत नाही तर त्याला कृतिशील सामाजिक दायित्वाची जोड द्यावी या उद्देशाने हा उपक्रम राजर्षी शाहू महाराज सोशल फाउंडेशनच्या माध्यमातून दर वर्षी राबविला जातो. उपक्रमाचे हे पाचवे वर्ष आहे.
या प्रसंगी पुणे मनपाचे उपायुक्त माधव जगताप, सहाय्यक आयुक्त संदीप कदम, राष्ट्रवादी महिला काँग्रेसच्या स्मिता वडघुले, राजर्षी शाहू महाराज सोशल फाउंडेशनचे कैलास वडघुले, प्रशांत धुमाळ, विराज तावरे, सोनाली धुमाळ उपस्थित होते. कोरोनाच्या पार्श्वभूमीवर गर्दी टाळण्यासाठी या उपक्रमाचे थेट प्रक्षेपण फेसबुक लाइव्हच्या माध्यमातून करण्यात येत असल्याचे राजर्षी शाहू महाराज सोशल फाउंडेशनचे अध्यक्ष कैलास वडघुले यांनी सांगितले.