हेल्थ कार्डचे १७०० नागरिकांना वाटप

NewsZenn Dec 8, 2021 707 0

भोसरी : "कोरोनाने आपले खूप नुकसान केले. जिवलग गमावले. समाज म्हणून याकडे पाहत असताना आरोग्याविषयी जाणीव, आपले डोळे उघडण्याचे काम कोरोनाने केले, असे म्हटले तर वावगे ठरणार नाही. आरोग्याकडे आपण आत्तापर्यंत फार दुर्लक्ष केले होते. सार्वजनिक आरोग्य व्यवस्था, विमा या सगळ्या गोष्टीची फार प्रकर्षाने जाणीव झाली. नगरसेवक अजित गव्हाणे यांनी भोसरीतील एक हजार सातशे नागरिकांचे आयुष्यमान भारत हेल्थ कार्ड काढून महत्त्वपूर्ण योगदान दिले आहे, असे मत खासदार डॉ. अमोल कोल्हे यांनी भोसरीत व्यक्त केले.

संत तुकारामनगर, भोसरी : येथे नगरसेवक अजित गव्हाणे यांनी आयोजित केलेल्या कार्यक्रमात नागरिकांना आयुष्यमान भारत हेल्थ कार्डचे वाटप खासदार डॉ. अमोल कोल्हे यांच्या हस्ते करण्यात आले.

राष्ट्रवादी काँग्रेसचे नगरसेवक अजित गव्हाणे यांच्या पुढाकारातून भोसरीतील १७०० नागरिकांना आयुष्यमान भारत कार्डचे खासदार डॉ. कोल्हे यांच्या हस्ते वितरण करण्यात आले. या वेळी ते बोलत होते. यावेळी नऊशे ३७ आरोग्य सुविधा आणि एक हजार आठशे ६२ हुन अधिक वैद्यकीय प्रक्रियांचे विमाकवच असलेले प्रधानमंत्री जन आरोग्य योजनेचे ओळखपत्र नागरिकांना दिले. यावेळी नगरसेविका अनुराधा गोफणे, प्रियांका बारसे, नगरसेवक संजय वाबळे, विक्रांत लांडे, श्याम लांडे, पंकज भालेकर, भोसरी विधानसभा युवक अध्यक्ष अमित लांडगे, उद्योजक भरत लांडगे, संजय उदावंत, प्रकाश सोमवंशी, ओबीसीचे सेलचे प्रदेश निरीक्षक सचिन औटी, माजी नगरसेवक चंद्रकांत वाळके, अमर फुगे आदींसह उपस्थित होते.

नगरसेवक गव्हाणे म्हणाले, आयुष्यमान भारत हेल्थकार्डमध्ये पाच लाख रुपयांचा विमा आहे. २०११ च्या जनगणनेप्रमाणे कार्डचे वाटप केले आहे. छाया बोरसे यांनी जनआरोग्य योजनेची माहिती दिली. कार्यक्रमाचे दीपक साकोरे यांनी सूत्रसंचालन केले. विजय लोखंडे यांनी आभार मानले.

Click Here To See More