कैद्यांनी विणलेली पैठणी राज्याचे गृहमंत्री अनिल देशमुख यांनी केली खरेदी

NewsZenn Jan 3, 2021 778 0

केवळ नव्या वर्षाची भेट म्हणून नव्हे तर ही पैठणी खरेदी करण्यामागे एक सामाजिक दृष्टीही आहे.

राज्याचे गृहमंत्री अनिल देशमुख यांनी शुक्रवारी पुण्यातील येरवडा मध्यवर्ती कारागृहाला भेट दिली. या ठिकाणी कैद्यांनी आपल्या कुशल कारागिरीद्वारे विणलेली पैठणी साडी खास आपल्या पत्नीसाठी विकत घेतली. साडी विकत घेतल्यानंतर त्याची साडे नऊ हजार रुपयांची किंमतही त्यांनी देऊ केली.
येरवडा कारागृहात विविध वस्तूंची कारखाने आहेत. या कारखान्यांमध्ये कैद्यांमधील कारागिरीतील कौशल्याप्रमाणे विविध उत्पादनं घेतली जातात. ही उत्पादनं विकण्यासाठी कारागृहाचे एक विक्री केंद्रही आहे. या विक्री केंद्राला गृहमंत्री अनिल देशमुख यांनी भेट दिली.

पैठणी खरेदीबद्दल विचारले असता देशमुख म्हणाले, “तुरुंगात येणारा प्रत्येकजण जन्मजात किंवा सराईत गुन्हेगार नसतो. संतापाच्या भरात किंवा परिस्थितीमुळे काहींच्या हातून गुन्हा घडून जातो. त्यानंतर न्यायदेवतेने सुनावलेली शिक्षा तो भोगत असतो. पण म्हणून त्यांचा माणूस म्हणून जगण्याचा हक्क हिरावला जात नाही. केलेल्या चुकीची शिक्षा भोगून झाल्यावर त्यांना पुन्हा समाजात सामावून घ्यायचे असते. यासाठी त्यांना कारागृहात केलेल्या श्रमदानाचा स्वत:च्या पायावर उभे राहण्यासाठी उपयोग होऊ शकतो. या केंद्रातून होणाऱ्या वस्तू विक्रीतून त्यांना मिळणारे उत्पन्न तुरुंगाबाहेरील नवे आयुष्य जगण्यास मदतीचे ठरू शकते, याच भूमिकेतून मी येरवडा कारागृहातील कैद्यांनी विणलेली पैठणी विकत घेतली.” यातून त्यांचा सामाजिक दृष्टीकोनही पाहायला मिळतो. कैद्यांना त्यांच आयुष्य पुन्हा नव्यानं जंग्याची संधी द्यायला हवी. आपणही त्यांनी तयार केलेल्या वस्तू घ्या असे आवाहनही त्यांनी यावेळी केले.