H3N8 बर्ड फ्लूचा पहिला रुग्ण चीनमध्ये आढळला

NewsZenn Apr 27, 2022 697 0

मानवामध्ये प्रथमच H3N8 बर्ड फ्लूचा संसर्ग आढळून आला आहे. मिळालेल्या माहितीनुसार, चीनच्या हेनान प्रांतात बर्ड फ्लूच्या H3N8 स्ट्रेनचा पहिला मानवी संसर्गाची नोंद झाली आहे. मंगळवारी मीडिया रिपोर्टमधून ही माहिती मिळाली. त्याच वेळी, चीनच्या राष्ट्रीय आरोग्य आयोगाने (NHC) जारी केलेल्या निवेदनात ही बाब घोषित करण्यात आली आहे. पण त्याचवेळी लोकांमध्ये त्याचा प्रसार होण्याचा धोका कमी असल्याचे देखील सांगण्यात आले आहे. त्यामुळे फार घाबरण्यासारखे काही नाही. H3N8 बद्दल अधिक माहिती देताना चीनच्या नॅशनल हेल्थ कमिशनने सांगितले की, एका चार वर्षांच्या मुलाला याचा संसर्ग झाला होता.

NHC नुसार, तापासह अनेक लक्षणे दिसू लागल्यानंतर मुलाला H3N8 विषाणूची लागण झाल्याचे आढळून आले. मात्र, त्याच्या संपर्कात आलेली कोणतीही व्यक्ती या विषाणूच्या विळख्यात सापडली नाही, ही दिलासादायक बाब आहे.

NHC नुसार, या मुलाच्या घरात कोंबड्या पाळलेल्या आहेत आणि तो राहतो त्या परिसरात जंगली बदकांचा देखील संचार असतो. त्यानंतर त्याच्यामध्ये तापासह अनेक लक्षणे दिसली आणि तपासणीत त्याला संसर्ग झाल्याचे आढळून आले.

राष्ट्रीय आरोग्य आयोगाने सांगितले की H3N8 संसर्ग जगात पहिल्यांदा घोडे, कुत्रे आणि पक्ष्यांमध्ये आढळला आहे. तथापि, H3N8 चे कोणतेही मानवी प्रकरण नोंदवले गेले नाही. म्हणजेच ही जगातील पहिली मानवी केस आहे. या प्रकारात अद्याप मानवांना प्रभावीपणे संक्रमित करण्याची क्षमता नव्हती. अशा स्थितीत मोठ्या प्रमाणावर महामारीचा धोका कमी आहे.

Click Here To See More