कोरोना महामारी कधी संपणार ?

NewsZenn Dec 16, 2021 670 0

जगभरातल्या कोरोना प्रादुर्भावामुळे सध्या सगळेच त्रस्त आहेत. ही महामारी कधी संपणार? हा एकच प्रश्न आज जगाला भेडसावत आहे. त्यामुळे प्रत्येकजण ही महामारी संपण्याची वाट पाहत आहे. पण महामारी संपली हे कळणार कसं? जग कसं ठरवणार की आता महामारी संपली आहे? जाणून घ्या तुमच्या मनातल्या या प्रश्नांची उत्तरं…

खरंतर महामारी संपली किंवा महामारी सुरू झाली हे समजण्याची कोणती ठोस व्याख्या नाही. ही महामारी किती काळ चालेल, त्यामुळे किती हानी होईल, असंही काही ठामपणे सांगता येणार नाही. कारण ही गोष्ट देशानुसार बदलणारी आहे. “हा काहीसा व्यक्तिनिष्ठ निर्णय आहे कारण तो केवळ रुग्णसंख्येबद्दल नाही तर महामारीच्या तीव्रतेबद्दल परिणामांबद्दल आहे”, असं जागतिक आरोग्य संघटनेच्या आपत्कालीन विभागाचे प्रमुख डॉ. मायकेल रायन, म्हणतात.

जानेवारी २०२० मध्ये जागतिक आरोग्य संघटनेने या कोरोना विषाणूला जागतिक आरोग्यासाठीच्या चिंतेचा विषय म्हणून घोषित केलं. त्यानंतर साधारण दोनच महिन्यांमध्ये म्हणजे मार्चमध्ये संयुक्त राष्ट्रांच्या आरोग्य यंत्रणेने या विषाणूप्रसाराला महामारी म्हणून घोषित केलं. कारण तोवर ह्या विषाणूचा प्रसार जगभरातल्या प्रत्येक खंडात, प्रत्येक देशात झाला होता.

हा विषाणू आता जागतिक चिंतेचा विषय नाही, असं जेव्हा जागतिक आरोग्य संघटना घोषित करेल, तेव्हा महामारी संपली, असं आपण मानून चालू. मात्र जागतिक आरोग्य संघटनेच्या तज्ज्ञांची समिती दर तीन महिन्यांनी परिस्थितीचं मूल्यांकन करत असते. त्यामुळे मधल्या काळात देशांमधल्या महामारीच्या तीव्रतेचे टप्पे बदलू शकतात. ड्युक विद्यापीठाच्या संसर्गजन्य रोग विभागाचे तज्ज्ञ डॉ. ख्रिस वुड सांगतात की, असा एक दिवस कधीच येणार नाही की जेव्हा आपण म्हणू शकतो की आता महामारी संपली. संपूर्ण जगासाठी महामारी संपल्याचा एक निकष लागू करता येणार नाही. जगभरातल्या देशांमध्ये काळाबरोबर रुग्णसंख्या कमी होताना दिसेल.

Click Here To See More