Visapur Fort | अतिवृष्टीचा भीषण तडाखा! विसापूर किल्ल्याचा भाग कोसळला; मावळातील पाठण गावात एकाच कुटुंबावर काळाचा घाला

NewsZenn Jul 6, 2026 15 0

पुणे । पुणे जिल्ह्यातील मावळ तालुक्यात मुसळधार पावसामुळे एक अत्यंत दुर्दैवी घटना घडली आहे. मावळ तालुक्यातील पाठण गावाजवळील विसापूर किल्ल्याचा एक भाग अतिवृष्टीमुळे कोसळल्याने गावातील एका घरावर मोठा दगडी ढिगारा कोसळला. या दुर्घटनेत नंदू तिकोणे, त्यांची पत्नी आणि मुलगा ढिगाऱ्याखाली अडकल्याची माहिती समोर आली आहे.

घटनेची माहिती मिळताच एनडीआरएफ, स्थानिक प्रशासन, पोलीस आणि ग्रामस्थांनी तातडीने घटनास्थळी धाव घेत बचावकार्य सुरू केले. ढिगारा हटवण्याचे काम युद्धपातळीवर सुरू असून, आतापर्यंत एका व्यक्तीचा मृतदेह बाहेर काढण्यात आला आहे. उर्वरित दोघांचा शोध अद्याप सुरू असून बचाव पथकाकडून सर्वतोपरी प्रयत्न केले जात आहेत.

गेल्या काही दिवसांपासून पुणे जिल्ह्यासह मावळ परिसरात मुसळधार पाऊस सुरू असून, डोंगरकड्यांवर दरडी कोसळण्याच्या घटना वाढल्या आहेत. या पार्श्वभूमीवर प्रशासनाने नागरिकांना डोंगराळ भागात जाणे टाळण्याचे आणि सतर्क राहण्याचे आवाहन केले आहे. या हृदयद्रावक घटनेमुळे संपूर्ण मावळ परिसरात शोककळा पसरली असून, बचावकार्य पूर्ण होईपर्यंत परिसरात प्रशासनाकडून विशेष खबरदारी घेतली जात आहे.

#VisapurFort #Maval #PuneRain #HeavyRain #Landslide #NDRF #RescueOperation #PuneNews #RainAlert #MaharashtraNews #DisasterNews #MonsoonUpdate #FortCollapse #EmergencyResponse #WeatherUpdate #TragicIncident #NewsUpdate