बॉलिवूड अभिनेत्री तनिषा मुखर्जीचा आर्यन खानला पाठिंबा

NewsZenn Oct 14, 2021 714 0

बॉलिवूड सुपरस्टार शाहरुख खानचा मुलगा आर्यन खानला एनसीबीने अटक केली आहे. शनिवार २ ऑक्टोबर रोजी मुंबईहून गोव्याकडे निघालेल्या क्रूझवर एनसीबीने केलेल्या छापेमारीदरम्यान एनसीबीने ही कारवाई केली आहे. या प्रकरणी आर्यनसह ७ जणांना १५ दिवसांची न्यायालयीन कोठडी सुनावण्यात आली आहे. तर दुसरीकडे या सर्वांचा जामीन अर्ज फेटाळण्यात आला. याप्रकरणी कोर्टात आर्यनची बाजू मांडण्यासाठी ज्येष्ठ वकील सतीश मानेशिंदे यांची नियुक्ती करण्यात आली होती. मात्र काही दिवसांपूर्वी आर्यनला जामीन नाकारल्यानंतर शाहरुखने केस लढवण्यासाठी वकील बदलले आहेत. शाहरुखने वरिष्ठ वकील अमित देसाई यांची नियुक्ती आर्यनसाठी केली आहे. दरम्यान, बॉलिवूड अभिनेत्री तनिषा मुखर्जीने आर्यन खानला पाठिंबा देत संताप व्यक्त केला आहे.

तनिषाने बॉम्बे टाइम्सला नुकतीच मुलाखत दिली. या मुलाखतीमध्ये तिने वक्तव्य करत आर्यनला पाठिंबा दिला. ‘मला असे वाटत आहे की आर्यन खानचा छळ होत आहे. एका मुलाला मीडिया ट्रायलमध्ये अडकवले जात आहे. ही खरी पत्रकारिता नाही, हे खळबळजनक आहे आणि बॉलिवूडला टार्गेट केले जात आहे. दुर्दैवाने लोक कलाकारांवर टीका करत आहेत’ असे तनिषा म्हणाली.

पुढे तनिषा म्हणाली, ‘हा देश सर्वांचा आहे आणि या देशातील लोकांनी पुरावे पाहून आपले विचार मांडायला हवेत. जर हे त्यांच्या मुलासोबत घडले तर? तेव्हा आपण काय करु? हा न्याय आहे का?’

तनिषापूर्वी पुजा भट्ट, जोया अख्तर, सुनील शेट्टी, सुझान खान, हृतिक रोशन, रवीना टंडन आणि इतर काही कलाकारांनी आर्यनला सोशल मीडिया पोस्टद्वारे पाठिंबा दिला होता.

Click Here To See More