येरवड्यात साकारणार आयटीआय प्रशिक्षण केंद्र, आमदार सुनील टिंगरे यांच्या पाठपुराव्याला यश

NewsZenn May 18, 2023 770 0

"विधानसभा निवडणूकीत नागरि प्रश्नांच्या सोडविणुकीबरोबरच रोजगार निर्मितीचे आश्वासन मी दिले होते. त्यानुसार येरवडा येथे आयटीआय संस्था स्थापन करण्यासाठी पाठपुरावा केला. हे संस्थेतून प्रशिक्षण घेऊन चाकण, राजंगणगाव परिसरात रोजगाराच्या संधी निश्चितपणे उपलब्ध होतील असा विश्वास आहे." असे मत वडगाव शेरी चे राष्ट्रवादीचे आमदार सुनील टिंगरे यांनी व्यक्त केले. वडगाव शेरी मतदारसंघातील येरवडा येथे नविन औद्योगिक प्रशिक्षण संस्था (आयटीआय) स्थापन करण्यास राज्य शासनाने मंजुरी दिली आहे. या आयटीआय प्रशिक्षण केंद्रात एकूण 9 विविध व्यावसायिक कोर्सेचे प्रशिक्षण मिळणार असून वर्षभरात जवळपास पावने चारशे विद्यार्थांना त्याचा लाभ मिळणार आहे.

वडगाव शेरीचे आमदार सुनिल टिंगरे यांनी येरवडा येथे आयटीआय प्रशिक्षण केंद्र सुरू करावी अशी मागणी राज्य शासनाकडे केली होती. त्यासाठी त्यांनी वेळोवेळी पाठपुरावा देखील केला होता. तत्कालीन अर्थमंत्री अजित पवार यांनी अर्थसंकल्पात येरवडा येथे आयटीआय सुरू करण्याची घोषणा केली होती. त्यानुसार शासनाकडून या संदर्भातील प्रक्रिया सुरू होती. बुधवारी येथील आयटीआय संस्था स्थापन करण्यासाठीचा अभ्यासक्रम, पदनिर्मिती व त्यासाठीच्या आवश्यक खर्चास मंजुरी देण्याचे आदेश कौशल्य, रोजगार, उद्योजकता व नाविन्यता विभागाने काढले आहेत.

येरवडा येथील आयटीआय प्रशिक्षण केंद्रात कॉम्प्युटर ऑपरेटर अ‍ॅण्ड प्रोगॅमिंग असिस्टंट, इलेक्ट्रॉनिक्स मेकॅनिक, टुल अ‍ॅण्ड डायमेकर, मेकॅनिक मोटार व्हेईकल, मेकॅनिक ऑटो बॉडी रिपेअर, मे़कॅनिक ऑटो पेटिंग, फिटर, इलेक्ट्रिशियन आणि वेल्डर या पदांचा समावेश आहे. त्यात एकूण 376 विद्यार्थांना प्रशिक्षण मिळणार असून त्यासाठी 40 विविध पदांच्या भरतीस मंजुरी देण्यात आली आहे.

Click Here To See More