मतदारांनी शहरातील 52 केंद्रांवर बजावला मतदानाचा हक्क
NewsZenn
Dec 2, 2020
822
0
पिंपरी : विधान परिषदेच्या पुणे पदवीधर व शिक्षक मतदारसंघातील निवडणुकीसाठी प्रत्यक्ष मतदानाला सकाळी आठ वाजता सुरुवात झाली. शहरातील 52 केंद्रांवर पदवीधर आणि शिक्षक मतदारांनी मतदानाचा हक्क बजावला. प्रत्येक केंद्रावर राजकीय कार्यकर्त्यांची गर्दी पाहायला मिळाली. दरम्यान, सध्या पुन्हा कोरोना रुग्णांची संख्या वाढत असल्याने मतदार संसर्गाच्या सावटाखाली दिसले. परिणामी पदवीधर, शिक्षक मतदार संघात नेमके किती टक्के मतदान होईल? याकडे सर्वांचे लक्ष लागले आहे.
या निवडणुकीसाठी शहराची चार भागांत विभागणी केली होती. पदवीधरसाठी 43, तर शिक्षक मतदारसंघासाठी नऊ मतदान केंद्राची सोय केली आहे. केंद्रावर या सकाळच्या टप्प्यात मतदारांनी काहीअंशी गर्दी केली होती. दुपारनंतर गर्दी ओसरली. प्रत्येक केंद्रावर मतदारांचे थर्मल गन आणि ऑक्सिमीटरने शारीरिक तापमानाची तपासणी केली जात होती. सोशल डिस्टन्सिंगचे पालन करत मतदानाची प्रक्रिया पार पडली. मात्र, कोरोनामुळे कुठल्याही केंद्रावर रांग पहायला मिळाली नाही. पोलिसांचा मोठा बंदोबस्त होता. थोड्या-थोड्या अंतराने शिक्षक मतपत्रिका घेऊन येत होते. शहर पातळीवर चुरस निर्माण झाल्याने राजकीय पक्षाचे कार्यकर्ते मतदान केंद्रावर बसूनच होते. मतदानासाठी आलेल्या मतदाराला आमच्या कार्यकर्त्याला मतदान करा, अशी गळ घालत होते. अप्पर तहसीलदार गीता गायकवाड यांनी प्रत्येक केंद्राला भेट देऊन पाहणी केली. काही केंद्रावर मतदारांच्या नावांचा गोंधळ पाहायला मिळाला. त्याचबरोबर मतदार यादीतही नावांचा गोंधळ पाहायला मिळाला. एकाच मतदाराचे नाव सहा सात वेळा यादीत आल्याने मतदार गोंधळून गेले.
Comments (0)
Facebook Comments (0)