मोशी-जाधववाडी प्रभागाच्या विकासासाठी वसंत बोराटे यांचा नगरसेवकपदाचा राजीनामा

NewsZenn Feb 16, 2022 814 0

मोशी : आगामी पिंपरी-चिंचवड महापालिका निवडणुकीच्या तोंडावर सत्ताधारी भाजपला झटके बसायला सुरुवात झाली. पहिला झटका शहराध्यक्ष, आमदार महेश लांडगे यांच्या भोसरीतून बसला आहे. प्रभाग क्रमांक दोन मोशी-जाधववाडी भागाचे प्रतिनिधित्व करणारे वसंत बोराटे यांनी भाजप नगरसेवक पदाचा राजीनामा दिला आहे.

मागील पाच वर्षात मोशी-जाधववाडीतील विविध आरक्षणे ताब्यात घेण्यासाठी शेवटपर्यंत प्रशासकीय ताकद मिळाली नाही. जाधववाडी आणि मोशीतील ग्रीन झोन हे रहिवासी झोन होणे आवश्यक होते. झाले नाही. परिणामी, विकास कामांना गती मिळाली नाही. अपेक्षित कामे झाली नाहीत. त्यामुळे या भागातील नागरिकांसाठी भाजप नगरसेवकपदाचा राजीनामा दिला असल्याचे वसंत बोराटे यांनी सांगितले.

आज (बुधवारी) महापालिका अतिरिक्त आयुक्त विकास ढाकणे यांच्याकडे भाजप नगरसेवकपदाचा राजीनामा दिला. त्यामुळे भाजपला पहिला झटका बसला आहे.

वसंत बोराटे प्रभाग क्रमांक दोन मोशी-जाधववाडी भागातून २०१७ मध्ये भाजपच्या चिन्हावर महापालिकेवर निवडून आले आहेत. शांत, संयमी त्यांचा स्वभाव आहे. मागील पाच वर्षात कारभारी महेश लांडगे यांनी बोराटे यांना पदासाठी खेळवत ठेवले. नाराज बोराटे यांची विधी समितीच्या सदस्यपदी बोळवण करण्याचा प्रयत्न केला.

पण, स्वाभिमानी बोराटे यांनी तडकाफडकी राजीनामा दिला होता. त्यांना महापौर, उपमहापौर, स्थायी समिती सदस्य, विषय समिती सभापती, प्रभाग समिती अध्यक्ष असे एकही पद दिले नाही. त्यामुळे त्यांची नाराजी वाढली होती. या नाराजीतून त्यांनी भाजपला रामराम ठोकला असून बोराटे राष्ट्रवादी काँग्रेसमध्ये जाण्याची शक्यता वर्तविली जात आहे.

Click Here To See More