प्रेमदिनासाठी बाजारपेठा सज्ज

NewsZenn Feb 12, 2021 762 0

महाविद्यालयीन विश्वात विशेष महत्त्व असलेला प्रेमदिन अर्थात व्हॅलेंटाइन डे अवघ्या दोन दिवसांवर आलेला असताना तरुणाईला आकर्षित करण्यासाठी बाजारपेठ सज्ज झाली आहे. प्रेमदिनाचे औचित्य साधत बाजारपेठ प्रेमी युगुलांसाठी आकर्षक भेटवस्तूंनी सजली आहे. महाविद्यालये करोना महामारीमुळे अजून बंद असल्याने प्रेमदिन साजरा करण्यासाठी काही मर्यादा आल्या असल्या तरी हा दिवस इतरत्र साजरा करण्याचे नियोजन महाविद्यालयीन विद्यार्थ्यांकडून करण्यात येत आहे. दुसरीकडे, अनुचित प्रकार टाळण्यासाठी पोलीसही रस्त्यावर उतरणार आहेत.

महाविद्यालयात पाऊल ठेवल्यानंतर चित्रपटांमध्ये पाहिलेले गुलाबी विश्व अनेकांना खुणावते. कधी वर्गात तर कधी आपल्याच मित्र परिवारातील आवडत्या व्यक्तीजवळ व्यक्त होण्यासाठी किंवा साद घालण्यासाठी प्रेम दिनाची आतुरतेने वाट पाहत असतात. यंदा करोनामुळे १० महिन्यांपासून महाविद्यालये बंद आहेत. १५ फेब्रुवारीपासून महाविद्यालये सुरू होणार असली तरी त्याआधीच येणाऱ्या प्रेमदिनाचे स्वागत करण्यासाठी तरुणाई सज्ज झाली आहे. तरुणाईचा हा उत्साह पाहता बाजारपेठेत हृदयाच्या आकारातील लाल रंगाचे फुगे, शुभेच्छापत्रे, रंगीत फुलांचे बुके, टेडी, किचेन, लहान-मोठय़ा आकारातील माती तसेच धातू शिल्प, चॉकलेट अशा वेगवेगळ्या भेटवस्तू बाजारात दिसू लागल्या आहेत. पारंपरिक शुभेच्छांची चौकट मोडण्यासाठी काही प्रेमवीरांनी आगाऊ नोंदणी करत आपल्या आवडत्या व्यक्तीचे छायाचित्र असलेली फ्रम, उशीचे अभ्रक, मॅजिक कप अशा काही हटके वस्तुंची मागणी केली आहे.

प्रेमदिनासाठी ऑनलाईन बाजारपेठही सज्ज, विविध ऑफर्स आणि आकर्षक डेट कूपन

कोरोनाच्या पार्श्वभूमीवर ऑनलाईन बाजारपेठही प्रेमदिनाच्या असंख्य ऑफर्स देत आहे. विविध जाहिराती, आकर्षक ऑफर्स मुळे आपल्या प्रियजनांना ऑनलाइन गिफ्ट, केक, बुके पाठवण्याचे प्रमाणही वाढत आहे.त्याचबरोबर काही ए कॉमर्स साईटवर विविध ऑफर्स सह डेट कूपनचेही वाटप केले जात आहे.विविध मॉल्स मध्ये आकर्षक सवलत, गेम्स, पार्टी यांचे आयोजनही करण्यात आले आहे.