'इंडिया बुक ऑफ रेकॉर्ड' मध्ये 'मोडी गर्ल' श्रुती गावडे यांची वर्णी

NewsZenn Apr 25, 2022 2558 0

छत्रपती शिवाजी महाराजांच्या जन्मदिनानिमित्त पुण्याच्या श्रुती गावडे यांनी कोथरुडमध्ये नॉर्थ डहाणूकर कॉलनी, तेजस नगर येथे मोडी लिपीतून एक लाख ११ हजार १११ वेळा ‘जाणता राजा’ लिहून छत्रपती शिवाजी महाराज यांची १२०० चौरस फुटी अश्वारूढ रांगोळी साकारली. या अनोख्या उपक्रमाची ‘इंडिया बुक ऑफ रेकोर्ड’ मध्ये नोंद झाली. मोडी लिपीच्या प्रसारासाठी मागील काही वर्षांपासून श्रुती काम करत आहेत.

आपल्या महाराष्ट्र राज्याच्या इतिहासाची गुपितं माहिती ज्या मोडी लिपीमध्ये दडली आहे, जी भाषा शिवरायांच्या पराक्रमाची वारसा अन स्वराज्याच्या रोमहर्षक इतिहासाची वर्णन सांगते ती मोडी लिपी, आपली भाषा कालपरत्वे अडगळीला पडते की काय असं वाटत असतानाच, श्रुती गावडे यांचा हा उपक्रम मोडी लिपीची साक्षरता दर्शवणारा आहे.

श्रुती गावडे या मोडी लिपीच्या प्रसार आणि प्रचारासाठी अभिनव आणि कलात्मक उपक्रम राबवत आहेत. पुण्यात हेल्मेट सक्ती झाल्यानंतर त्यांनी स्वर, व्यंजन वापरून बनवलेले हेल्मेट खूपच गाजले. त्यानंतर त्यांनी दुचाकी देखील मोडी लिपीतून बनवली. मुलांना मोडी लिपीची गोडी लागावी, त्यांना ही लिपी समजावी यासाठी श्रुती यांनी मोडीतून अक्षर चकल्या बनवल्या. चहाचे कप, कॅलेंडर असे अनेक उपक्रम त्यांनी आजवर मोडीच्या प्रसारासाठी राबवले आहेत.

ह्या विषयी बोलताना श्रुती गावडे म्हणाल्या, “सन २०१६पासून मी मोडी लिपीच्या प्रसारासाठी काम करत आहे. आपला इतिहास मोडी लिपीतून आहे, तो समजून घेण्यासाठी तसेच इतिहासाच्या पानांमध्ये रमण्यासाठी मोडी लिपी अवगत असणे आवश्यक आहे. छत्रपती शिवाजी महाराजांनी आपल्याला दिलेल्या अनेक वारसांपैकी मोडी लिपी हा देखील एक वारसा आहे. त्यामुळे त्याचा प्रसार व्हायलाच हवा.

मी करत असलेल्या कामाची नोंद इंडिया बुक ऑफ रेकोर्डमध्ये नोंद व्हावी, असे माझ्या वडिलांचे स्वप्न होते. शिवजयंतीनिमित्त राबवलेल्या उपक्रमाची नोंद इंडिया बुक ऑफ रेकोर्डमध्ये झाल्याने वडिलांचे स्वप्न पूर्ण झाले आहे. गेल्या दोन वर्षांपूर्वी त्यांचे निधन झाले. त्यांचे स्वप्न पूर्ण करू शकले याचा खूप आनंद होत असल्याचेही श्रुती गावडे यांनी सांगितले.

श्रुती यांच्या आई, भाऊ तसेच आत्या माजी नगरसेविका हर्षाली दिनेश माथवड यांनी त्यांना या उपक्रमासाठी सहकार्य केले. मोडी लिपीच्या प्रसाराच्या कामासाठी ते सातत्याने मदत करतात, असेही श्रुती यांनी सांगितले.

Click Here To See More