सर्व लेक्चर ऑनलाईन मग परीक्षा ऑफलाईन का; दहावी, बारावीच्या विद्यार्थ्यांचे आंदोलन

NewsZenn Jan 31, 2022 749 0

वर्षभर सर्व लेक्चर ऑनलाईन झाले. आता शाळा महाविद्यालये परिक्षा ऑफलाईन घेण्याच्या तयारीत आहेत. याच्या विरोधात विद्यार्थी रस्त्यावर उतरले असून निगडी येथे दोन ठिकाणी दहावी बारावीच्या विद्यार्थ्यांनी आंदोलन केले.

निगडी मधील डी वाय पाटील, पीसीईटी, म्हाळसाकांत या शाळा महाविद्यालयातील सुमारे १५० ते २०० विद्यार्थी आज सकाळी रस्त्यावर उतरले. कोरोनाच्या पार्श्वभूमीवर विद्यार्थ्यांना शाळेत प्रत्यक्षात न शिकवता त्यांचा सर्व अभ्यासक्रम ऑनलाईन शिकवण्यात आला. आता शाळा, महाविद्यालये ऑफलाईन परीक्षा घेण्याची तयारी करीत आहेत. सुमारे ९० टक्के अभ्यासक्रम ऑनलाईन झालेला असताना परीक्षा ऑफलाईन का? असा सवाल विचारत विद्यार्थी रस्त्यावर आले.

निगडी येथील पवळे उड्डाणपुलाखालील चौकात काही विद्यार्थी जमा झाले. तिथे त्यांनी शाळा प्रशासनाचा निषेध केला. हे आंदोलन विद्यार्थ्यांनी सोशल मीडियावर ऑनलाईन पाहिले. त्यानंतर आणखी विद्यार्थी जमा झाले. पवळे उड्डाणपुलाखाली आंदोलन केल्यानंतर मुलांनी एलआयसी चौक, निगडी येथे देखील आंदोलन केले.

दरम्यान, निगडी पोलीस आंदोलनाच्या ठिकाणी दाखल झाले. पोलिसांनी मुलांना समजावले. त्यावेळी पोलिसांनी मुलांना मारहाण केल्याचे प्रत्यक्षदर्शी सांगत आहेत. मात्र याला पोलिसांनी दुजोरा दिलेला नाही. काही वेळानंतर मुले पांगली.

वरिष्ठ पोलीस निरीक्षक गणेश जवादवाड म्हणाले, “काही मुले सकाळी निगडी चौकात जमा झाली होती. रस्ता अडवण्याचा त्यांचा इरादा होता. पोलिसांनी त्यांना रस्ता न अडवण्याबाबत सांगितले. तसेच त्यांच्या मागण्यांबाबत शिक्षणाधिकारी अथवा जिल्हाधिका-यांना निवेदन, पत्र देऊन याबाबत चर्चा करावी, अशी विनंती पोलिसांकडून करण्यात आली. कायदेशीर कारवाई झाल्यास पुढील धोके पोलिसांनी मुलांना समजावून सांगितले. त्यानंतर सर्वजण तिथून निघून गेले.”

Click Here To See More