HSRP ला पुन्हा मुदतवाढ; १ जुलैपासून सक्ती, नियम न पाळल्यास ₹1000 दंड

NewsZenn May 18, 2026 33 0

मुंबई : जुन्या वाहनांवर उच्च सुरक्षा नोंदणी क्रमांक पाटी (HSRP) बसवण्याबाबत सरकारने पुन्हा एकदा मुदतवाढ दिली असून आता वाहनधारकांना ३० जूनपर्यंतचा अंतिम अवधी देण्यात आला आहे. १ जुलै 2026 पासून HSRP अनिवार्य करण्यात येणार असून नियमांचे उल्लंघन करणाऱ्यांवर ₹1000 दंड आकारला जाणार आहे.

सर्वोच्च न्यायालयाच्या आदेशानुसार आणि केंद्र सरकारच्या मार्गदर्शक सूचनांनुसार १ एप्रिल 2019 पूर्वी नोंदणीकृत सर्व वाहनांसाठी HSRP बंधनकारक आहे. नव्या वाहनांवर ही पाटी आधीपासूनच अनिवार्य आहे.यापूर्वी HSRP बसवण्यासाठी सरकारने पाच वेळा मुदतवाढ दिली होती. तरीही अनेक वाहनधारकांनी याकडे दुर्लक्ष केले. आता अंतिम तारीख जाहीर झाल्याने पुढील काही दिवसांत HSRP बसवण्यासाठी मोठी गर्दी होण्याची शक्यता आहे.

परिवहन मंत्री प्रताप सरनाईक यांनी वाहनधारकांना आवाहन करताना सांगितले की, “ऑनलाइन पद्धतीने HSRP साठी नोंदणी करता येते. मुदतवाढीचा लाभ घेऊन सर्वांनी तातडीने पाटी बसवून घ्यावी.”दरम्यान, या निर्णयावर वाहन चालक-मालक संघटनांनी नाराजी व्यक्त केली आहे. संघटनांचे म्हणणे आहे की,

HSRP साठी पुरेशा सुविधा उपलब्ध नाहीत पाटीचा दर्जा खराब आहे एक पाटी खराब झाल्यास दोन्ही पाट्या पुन्हा घ्याव्या लागतात, ज्यामुळे आर्थिक भुर्दंड बसतो. राज्य वाहन चालक-मालक व प्रतिनिधी महासंघाचे अध्यक्ष बाबा शिंदे यांनी सांगितले की, “प्रथम प्रणालीतील त्रुटी दूर कराव्यात, त्यानंतर सक्ती आणि दंड आकारणी करावी.” सरकारच्या निर्णयामुळे वाहनधारकांमध्ये संभ्रम आणि नाराजीचे वातावरण असून, पुढील काही दिवसांत या विषयावर आणखी हालचाली होण्याची शक्यता आहे.